مالي نفس وما اشتهي ! مشكلة فقد الشهيه

 

السلام عليكم

اول موضوع بالعام الجديد 2016 ان شاء الله تكون سنه خير على الجميع

بالمناسبه تكتبون اهدافكم بداية كل سنه والا لا ؟ اذا لا جربو هالسنه تسونها  وبنهاية السنه تشوفون كيف انجزتو

من اهم اهدافي هالسنه ابتعد عن التسويف بالتدوين والتزم اكثر وان شاء الله بتشوفون مواضيع تعجبكم

 

نجي لموضوعنا اليوم حسب اختياركم بتصويت سناب شات وهو مشكله فقد الشهيه

كثير ما نسمع مو مشتهيه او مالي نفس

عاد جدتي الله يذكرها بالخير اذا سمعت احد يقول كذا قالت له "الفاقه تحت الضرس" ههههههه وغالبا يصدق هالمثل يوم يبدا ياكل يخلص الصحون عننا

 

طيب خلونا نتعرف سوا على المقصود بالشهيه وكيف يتعرض الانسان لفقد الشهيه الاسباب والعلاج

 

 

تعريف الشهيه من ويكيبيديا

الشهية هي رغبة الشخص لتناول الطعام نتيجة للشعور بالجوع وهذه الرغبة مهمة جدا لإمداد الجسم بالطاقة اللازمة للعديد من العمليات الحيوية. ويتم تنظيم الشهية من خلال إشارات متبادلة بين الدماغ والجهاز الهضمي وانسجة الجسم المختلفه

وتعد منطقة تحت المهاد (Hypothalamus) المنظم الرئيسي للشهية حيث تستقبل إشارات الجوع من الجهاز الهضمي من خلال هرمون اللبتين والغريلن وكولي سيستوكنين يؤدي تحت المهاد وظائف حيوية للجسم حيث يضبط بعض عمليات الأيض،

 

منطقة تحت المهاد هي المشار اليها باللون البرتقالي بالصوره

 

ننتقل الى اسباب فقد الشهيه اللي على اساسها نتبع العلاج الانسب, يقال اذا عرف السبب بطل العجب

 

اسباب فقدان الشهيه

1. الإصابة ببعض الامراض مثل أمراض المعدة والأمعاء ,وأمراض اللثة والأسنان وآلامها, و أمراض الغدد اللعابية, و الاضطرابات في الأنبوب الهضمي
2. الاضطرابات العاطفية لدى الإنسان التي قد تسبب فقد الشهيه او فرطها مثل:حالات الحزن أو الغضب أو القلق والهم والتفكير المستمر
3. الجلسات المطوله على الكمبيوتر والإنترنت
4. الافراط في تناول القهوة أو الشاي أو المشروبات الغازية وخصوصا قبل تناول الطعام بفترة
5. النوم بكثره وعدم تحديد ساعات النوم
6. عدم تنظيم الوجبات واهمال تناول بعضها
7. التدخين

 



علاج فقد الشهيه  

 

بعد معرفة الاسباب يتحدد نوع العلاج استنادا على السبب فبعض الاسباب تحتاج  لزيارة الطبيب وبعضها تحتاج تنظيم منك

وهنا راح اورد بعض المواد الغذائية اللازم تناولها عند الإصابة بقلة الشهية :

 

1-      تنويع الاطباق في الوجبه الوحده لان التنوع يعود على الجسم بفوائد غذائيه اكثر ومن جهه ثانيه راح تتنوع النكهات وهالشي يزيد من الشهيه

2-      تهيئة المكان قبل الاكل يساعد على فتح الشهيه يعني تاكلين بمكان معطر مرتب ما يقارن باكلك بالمطبخ على ريحة الكشنه . وما ننسى ترتيب السفره يقولك العين تاكل قبل الفم والا لا!

3-      استخدام فواتح الشهيه الطبيعه في اعداد الاكل, مثل: الفلفل, الخل, الليمون

 

4-      الالتزام بالوجبات الرئيسيه بدون تفويت أي وجبه

 

5-      تنظيم ساعات النوم وساعات الجلوس على الانترنت

 

6-      لا تستخدمين فواتح شهيه طبيه بدون استشارة طبيب

 

7-      هالنقطه خاصه باللي ضروري يشربون قهوه الصباح, لا يبدا يومكم بالقهوه خلو القهوه بعد الفطور

اتمنى اكون غطيت الموضوع من جميع الجهات

اشوفكم بتدوينه رياضيه يحبها قلبكم

استودعتكم الله..

 

 

 

 



تكبير الصدر بين الممكن والمستحيل

 

 

 

اسعد الله صباحكم/مسائكم بالخيرات

من فتره ما دونت ويقولك من طول الغيبات جاب الغنايم

 

مثل مو واضح لكم بالعنوان التدوينه راح تتكلم عن تكبير الصدر, سبب اختياري لهالموضوع هو اللي شفته من هوس البنات فيه وتجارب وخزعبلات بعيده عن العقل والمنطق

 

راح نشوف بالتدوينه بأذن الله تركيب الثدي لدى الرجل والمرأه والعوامل الموثره في حجم وشكل ثدي المرأه والعلاج المناسب استنادا على العامل المؤثر و فوائد مساج الثدي واخيرا علاقة هرمون الاستروجين بحجم الثدي

تدوينه طويله ومليانه معلومات فلا تنسين تجيبين لك سناك

 

 

الفرق بين تركيبه الثدي لدى المرأه والرجل

     

 

مثل مو واضح امامكم منطقة الصدر عند الرجل تتكون من عضل اما المرأه من دهون وبعض التركيبات راح نتطرق لها بعد شوي.

عشان كذا نلاحظ انه الرجل تكبر منطقة الصدر عنده بالرياضه  على عكس المرأه  عضلات الصدر عندها علويه ووسطى (خلف التركيبه الدهنيه بنسبه قليله )وسفليه فتمارين الصدر للمرأه تشتغل عالعضله السفليه عشان بدورها ترفع النسيج الدهني فيبان شكل الصدر اكبر .

هالصوره تبين عضلات الصدر الوسطى

 

 

 التركيب الداخلي

  فصوص lobes

فصيصات lobules

 القنوات ducts

الحويصلات الهوائيه alveoil

الغدد اللمفاويه lymph nodes

 

يحتوي الثدي على عدد من الفيصاصات التي تصل بين الحويصلات الهوائيه وحلمة الثدي عن طرق قنوات صغيره تعمل اثناء عملية الارضاع , (تتمثل بالمنطقه البنفسجيه بالصوره) ما راح افصل بهالنقطه اكثر لانه تركيب طبيعي لاي مرأه ماله أي علاقه بحجم الثدي الا في حالة المرأه المرضع

 

 

 نجي هنا لمربط الفرس والمتحكم بحجم وشكل الثدي

الدهون fat

النسيج الضام connective tissue

الاربطه ligments

 حجم الدهون في هالمنطقه يحدد حجم الثدي

 

العوامل المؤثره في حجم الصدر  

 1- الجينات

وبحسب اخر الابحاث هي اللي تلعب الدور الاكبر في حجم الثدي واذا بنقيس على هالقاعده ونطبقها على ارض الواقع راح نلاحظ مثلا بنساء شرق اسيا صغر حجم الثدي والعكس في نساء جنوب افريقيا
فاذا ما انطبق عليك احد العوامل الجايه قد يكون صغر الثدي عندك عامل وراثي
2- الوزن
الوزن من اكثر العوامل انتشارا بمجتمع النحيفات فاذا انتي نحيفه لا تشتكين من حجم صدرك لان هالشي طبيعي بالنسبه لوزنك وخصوصا مثل ما عرفنا انه حجم منطقة الصدر عباره عن دهون
والا عمرك شفتي سمينه صدرها صغير ؟ وحتى دائما نشوف بصور المقارنه بين قبل وبعد السمينات اللي خسرو وزن نشوف ايضا انه حجم الصدر صغر لانه مرتبط بشكل اساسي بالوزن
3- العمر
بحيث يبدا حجم الصدر بالنمو عند البنت من مرحله البلوغ
4- الرضاعه
والان هل تكبير الصدر ممكن او مستحيل ؟

اذا كان العامل المؤثر هو الجينات والوراثه تكبير الصدر ممكن عن طريق العيادات التجميليه اما بزراعه مادة من السيلكون او انهم يأخذون من دهون جسمك وتحقن بمنطقة الصدر
اما اذا كان العامل المؤثر هو الوزن فالحل بديهي وهو زيادة وزنك بطريقه صحيه طبعا
بتقولون لي ليليان شلون بطريقة صحيه اذا الصدرعباره عن دهون !
بقولكم وين الدهون الصحيه الموجوده بالاكل ؟

الرياضه ومنطقة الصدر
 مثل ما قلنا انه منطقة الصدر فيها 3 عضلات علويه ووسطى وسفليه
بالنسبه لعضلات الجزء العلويه ما راح نشتغل عليها بالرياضه نهائيا
بالرياضه راح نشتغل على المنطقه الوسطى والسفليه
ايش فوائد الرياضه لصدر اذا ما راح يكبره بما انه عباره عن دهون ؟
 1- تقوية العضلات المحيطه بالصدر لمنعه من الترهل
2- شد الصدر وتناسق شكله
3- تقوية العضلات لمحيطه بالصدر ترفع النسيج الدهني مما يوحي بكبر حجم الثدي

وهنا فيديو فيه اهم تمارين منطقة الصدر اضغط هنا

دور المساج في تكبير الثدي
للامانه احترت بهالجانب بحوث تقول انه يحفز الخلايا السرطانيه وبحوث تقول انه يحفز الدوره الدمويه
لاكن هل المساج فعلا له دور بتكبير الصدر ؟
باختلاف الاراء انا احترت فقررت اني اكون فار التجارب هالمره
طبقت مساج الصدر بانتضام مرتين باليوم لمدة شهر مع الرياضه
والنتيجه كانت : زيادة انشين ونصف في محيط الصدر
لاكن  احب اذكركم انه استجابة الاجسام تختلف اللي نفع معي ممكن ما ينفع معك والعكس صحيح
فاذا ما اثر فيك المساج يمكن جسمك استجابته مختلفه لا تحطين تجربتي كمقياس
انا جربت من ناحية الفضول هل فعلا المساج له تأثير او لا
بالنسبه لي كان مؤثر قد توافقيني التجربه او لا

استخدمت بالمساج زيت زيتون عصره اولى سخنته عن طريق فرك اليدين ببعض وطبقت المساج بنفس الخطوات بالصوره
10 مرات لكل خطوه مرتين باليوم
في حال جربتي المساج اتمنى تشاركيني رأيك بالتعليقات عشان نقدر نسوي احصائيه اذا فعلا فعال او لا

واخيرا هرمون الاستروجين وعلاقته بتكبير الثدي

جنن البنات هالهرمون وصارو كثير ياخذونه عن طريق كبسولات او يبحثون عن مصادره بأي طريقه وكأنه هرمون المعجزات!!
فعلا هرمون الاستروجين له علاقه بحجم الثدي لاكن مو معناه تاخذينه عالعمياني فهو مثله مثل أي هرمون بالجسم نقصه او زيادته خطر عالجسم.

ماهو هرمون الاستروجين ؟ الإستروجينات (Estrogens أو Oestrogens) (من الاسترات الدهنية) هي هرمونات أنثوية يفرزها المبـِيض كهرمون الجنس الأولي ويتوقف إفرازها عند الأنثى عند بلوغها الإياس.  وللمزيد من المعلومات حول هرمون الاستروجين ويكيبيديا

في حال كان عندك نقص في هرمون الاستروجين "بعد الفحص"
هنا امثله على بعض الاغذية الغنيه بهرمون الاستروجين

 

وبكذا يكون انتهى موضوعي اتمنى اكون وفقت فيه

أي اسأله واستفسارات اتركوها لي بالتعليقات

 

 

المصادر resources

هنا 1
هنا 2 



كلام من القلب للقلب, تفضل عزيزي النحيف

صباح/ مساء الجمال

 

بعيد عن الاكل والرياضه هالموضوع يمكن عتاب او نصيحه لك اختي الجميله, ما ادري ايش اوصفه بالحقيقه لاكن هي كومة حكي فيني حابه انها توصل لكل بنت تعاني من النحافه

 

مثل مافيه شريحه من المجتمع تعاني من السمنه والكل يشجعها ويدعمها, بالمقابل فيه شريحه تعاني من النحافه الشديده ومو لاقيه أي دعم ومع الاسف ان تطرق بعض الاطباء لموضوعهم ما يعطونهم بالقدر الكافي

 

ما ادري هو استهتار بالموضوع او محد مستوعب انهم محتاجين هالدعم !!

بس هالموضوع ما راح ابحث فيه عن الدعم الخارجي, راح اتطرق فيه لدعمك لنفسك, للكسل والتبلد اللي اشوفه بالنحيفات

كثير اشوف نحيفات جميلات بس النحف مخرب عليهم

 الى متى وانتي جالسه تبحثين عن شيء يساعدك بزيادة وزنك وما تطبقينه؟ الى متى بتقولين من بكرا أبدا وكل يوم تأجلينه لبكرا؟ الى ماتجين لمناسبة وتتضايقين من الانتقادات اللي تجيك بعدين؟ الى متى وانتي تشوفين التغيير وماتطبقينه؟ الى متى وانتي تناظرين ملابس نفسك فيها بس ما راح تطلع حلوه ع جسمك؟ الى متى وانتي تحلمين بالجسم المثالي وانتي حاطه يدك على خَدَّك؟  

اذا انتي ما تغيرتي من داخلك ما راح توصلين! اذا انتي تعيجزتي وتكيسلتي ما راح توصلين! 

قبل فتره شاركت البنات صوره بسناب شات لما كنت نحيفه ولما زاد وزني بغرض تحفيزهم، جاني سؤال *كم جلستي فتره عشان يزيد وزنك؟* جاوبتها ب* قرابة ٥ شهور وهالشي يختلف من بنت لبنت ومع العلم أني لسا باقي اشتغل على نفسي لسا ما وصلت للي ابيه بالضبط* قالت لي يووه مشوار ٥ شهور رياضه وشغل ولك خلق باقي تكملين انا لو مكانك أوقف كذا كويس... 

اذا مالك خلق لنفسك، لمين بيكون لك خلق بالحياه؟ كيف تبين الناس يصير لهم خلق لك اذا انتي مالك خلق لنفسك؟ هالخمس شهور وهالسنه والسنتين بتمر كذا والا كذا؟ لاكن اما تمر وانتي طالعه بنتيجه وأما تمر وانتي تدورين على حلول بدون تطبيقها.. 

لا تحطين لنفسك اعذار تحبط من عزيمتك، تدرسين وما عندك وقت تطبقين اكل صحي لنفسك؟ ( باستثناء انك تقدرين تنظمين وقتك) الاكل الصحي مو بذاك التعقيد فيه كثير وصفات مصوره اعطيها للي يطبخ عندكم بالبيت سواء طباخ او الوالده، بتقولين امي تعترض عالاكل الصحي تقول انه بينحف، ادري باقي فيه امهات الله يهديهم مقتنعين بهالفكره وما ألومهم لان المجتمع فرض هالفكره عليهم بس لا تقولين لها انها وجبه صحيه، قولي يمه شوفي ذا شكله لذيذ وش رأيك تسوينه لنا عالغدا اليوم ومن هالحيل اللي تقدرين عليها. بدل ما انتي جالسه تطلعين اعذار عشان ما تسوين هالشي كوني ايجابيه وطلعي أفكار عشان تساعدك تسوينه. نظمي وقتك وخصصي منه شي لنفسك، لا تقولين ماعندي وقت ! عندك وقت تجلسين تسولفين عالواتساب بالساعات وماعندك نص ساعه لنفسك! عندك وقت تتصفحين تويتر وانستقرام وباث وماعندك وقت بسيط لنفسك! عندك وقت تتابعين اخبار الناس ولا عندك وقت لنفسك! شايفين انه فيه وقت! بس محتاج استثمار فقط. 

كل شي بيدك وكل شي موجود حولك وتقدرين توصلين وتسوين اللي تبينه لما تعرفين قيمة نفسك، لما تعطين نفسك حقها قبل كل شي، لما تتيقنين انك جميله وما يليق فيك الا الجمال، لما تقدرين مشاعرك اللي كثير يجرحونها بحكيهم وتطنزهم على جسمك. خلاص الى متى؟ قولي ستوب واعرفي قيمة نفسك وأنك تستاهلين الافضل وابدأي من الآن 

اسفه يمكن ثقلت بالحكي وطولت بس حسيته كلام بخاطري لازم اوصله، يمكن حكيي يجرح البعض لكونه حقيقه، بس اجرحك من خلف الشاشه وما تعرفين مين انا وما اعرف مين انتي ولا تجين بموقف تنجرحين فيه من اقارب، كثير انحطيت بمواقف تحز بخاطري بسبب جسمي وهي اللي غيّرتني للافضل وما ودي البنات ينحطون فيها، بخاطري اوريكم وحده وحده انه عندك فرصه قبل لا يأذي مشاعرك شي

طلب اخير، أتمنى اشوف تعليقاتكم عالموضوع ورأيكم فيه وحتى نقدكم

كلنا نتعلم من بعض، ودمتم بسعادة واحلام محققه

لعبة الكالوري ( ذكاء الاكل )

من العنوان يتبين لكم انه موضوع اليوم بعيد عن الرياضه

اللي يعرفني بيعرف انه آكلي ونشاطي قائم عالنظام الصحي قد ما اقدر، بينما للحين نسمع بالمعتقد اللي يقولك انه الاكل الصحي لسمين عشان ينزل وزنه ومع الاسف باقي شريحة كبيره من المجتمع تصدق هالشي ! 

طيب خلّونا نفكر فيها بعقل شوي، النحيف صحته خربوطه يعني ! يأكل اللي يجي اهم شي يسمن والصحه باي باي! 

غير انه الاكل الصحي ماهو علاج يصرف من طبيب، الاكل الصحي هو الطبيعه اللي أوجدها لنا رب الكون عشان نعيش عليها، يعني هو الأساس اللي نعيش عليه قبل ما تطلع لنا كل هالوجبات

هالموضوع ما راح يكون مخصص لنحيف بس، هو لنحيف والسمين واللي يبي يحافظ ع وزنه بعد  

ماهو الكالوري ؟ 

اقدر آصف الف تعريف علمي للكالوري لاكن ما احب هالاسلوب بالطرح احب اشرح كأني اسولف مع اختي او صديقتي، فاللي حابه تطلع على تعريفات ويكيبيديا ما يقصر

الكالوري بعيد عن الكلام العلمي هي السعرات الحراريه بالاكل، بمعنى انه كل شيء تآكلينه فيه نسب كالوري متفاوته 

هالسعرات الحراريه لها دور بتحديد وزنك، فكل ما زاد الكالوري زاد الوزن وكلما قل يقل الوزن بالتالي 

طيب شلون نلعب لعبة الكالوري بذكاء؟ 

من اعذار النحيف دائما، معدتي صغيره ما اقدر اكل وجبات كثير او بكميات كثيره، طيب ياعزيزي النحيف اكل بالكميه اللي تقدر عليها لاكن زيد بالكالوري بحيث ما يأثر على عذر حجم المعده 

ومع الوقت راح تزيد عملية الأيض عندك وتلقى نفسك تجوع اكثر وتآكل بكمية اكثر 

كثير أشياء صحيه فيها نسب كالوري عاليه وهي ما تشكل ضرر بحجم الوجبه

على سبيل المثال 

 عادة ما يكون الاكل اللي يحتوي على نسبة دهون فيه سعرات حراريه عاليه، طيب شلون دهون وانتي تقولين سمنه صحيه!

المقصود هنا الدهون الصحيه الموجوده بزيت الزيتون مثلا والمكسرات والاسماك والافكادو وغيره كثير 

استخدموهم كإضافات ع الطبق مما يزيد من سعراته الحراريه 

اضيفي زيت زيتون وافكادو ع السلطه 

اضيفي خضار ع الرز 

اضيفي عسل للعصيرات بدل من السكر 

اضيفي مكسرات على اطباقك بشكل عام تعطي طعم لذيذ وترفع نسبة الكالوري 

ابتكروا صوصات تضيفونها ع أطباقكم بمكونات صحيه وسعرات حراريه عاليه 

والأمثلة ما تنتهي ولا لها حصر الموضوع ذائقه وابداع تقدرين تتفنين فيه 

معلومات مهمه 

الجسم يحتاج عدد معين من السعرات الحراريه بناء على نشاطك الحركي ووزنك وطولك سواء كنت نحيف او سمين 

ف اذا تبين تزيدين وزنك لازم اول تعرفين المعدل الطبيعي اللي تحتاجينه لسعرات الحراريه ومن ثم تزيدين عليها من ٥٠٠ الى ١٠٠٠ سعره بالتدريج 

كيف تعرفين معدل سعراته الحراريه وكيف تزيدينه شرحته من قبل ضروري تمرون عليه هنا

 

وبكذا خلص موضوعي اتمنى يكون اضاف لكم فائده

البروتين من والى

 

 

صباح/ مساء الصحه والشاط 

موضوع اليوم من المواضيع اللي انتو طلبتوها وهو البروتين 

ماهو البروتين؟ منافعه؟ أضراره؟ أنواعه؟ مصادره؟ 

كل هالاشياء راح تتعرفين عليها بموضوع اليوم 

بسم الله نبدأ 

ماهو البروتين ؟ 

البروتين احد المصادر الغذائية اللي يحتاج لها جسم الانسان والتي تتكون من الأحماض الامينيه اللي تساعد على إصلاح وبناء الانسجه ، يؤخذ البروتين قبل التمرين بساعه او بعده مباشره، يؤخذ في يوم التمرين فقط 

انواع البروتين، ايهم أفضلها؟ 

مما لا شك فيه انه البروتين موجود بطعامنا العادي ولاكن الجسم ما يأخذ كفايته لبناء العضلات فنحتاج لمكمل غذائي في هالحاله والبروتين ماله اي ضرر الا بشغله وحده في حال اهملتيها راح اذكرها بنهاية الموضوع، تقدرين تستخدمينه وانتي مرتاحه 

البروتين له ثلاث انواع، وبما اني مو أخصائية تغذيه عشان احدد لك أفضلهم راح نترك الطب يتكلم بالأنواع وأفضلها

 

 

 

 

فوائد البروتين 

البروتين اولا راح يساعدك على بناء العضل -ارجع وأقول ماراح تصيرين معضله مثل الرجال أبدا- خلوني اشرح لكم دور البروتين في بناء العضل، مو بعد ما تسوين تمرين تحسين العضله مشدودة ! البروتين راح يساعد العضله انها تحافظ على هالشكل لليوم اللي راح تكررين فيه هالرياضه  فالبتالي لما يجي يوم التمرين الثاني تكون العضله مشدودة وما انهدمت مما يساعد في زيادة حجمها وهكذا 

ايضا البروتين له فوائد منعكسه على صحة البشره والشعر  

أضرار البروتين ؟ 

الضرر الوحيد لليوم يكمن في استخدامك الخاطىء للبروتين 

يعني تاكلين بروتين وتحطين رجل ع رجل وتبين العضله تنشد! لا يا ماما لازم تحرقينه بالرياضه اذا ناويه تاخذينه بدون رياضه اتركيه افضل لان هالشي راح ينعكس على صحة الكلى 

شرب قدر كافي من الماء بشكل يومي يحميك من ضرر البروتين 

مصادر البروتين 

باقي متخوفين من موضوع مكملات البروتين!  مو مشكله دائما فيه بديل من الطبيعه 

البروتين له مصادر نباتية وحيوانية لاكن لازم تاكلين منه بكميات كبيره عشان تاخذين الحصه الكافيه لبناء العضل 

المصادر النباتية:  البروكلي، السبانخ ، القرنبيط، البقدونس ، المشروم، بذور الشيا ...الخ 

المصادر الحيوانيه: اللحوم بأنواعها، البيض، السمك، الدواجن ، الحليب... الخ 

 

وبكذا يكون انتهى الموضوع أتمنى أكون غطيته من جميع الجوانب ️

العضله النائمة

صباح/مساء الرشاقه والصحه

بما اني رجعت لدوام راح تكون المواضيع كل يوم جمعه وسبت وأحد ان شاء الله،

موضوعنا اليوم عن العضله النائمه وهي مشكله مزعجه ومحرجه في كثير من الاحيان 

لاكن كل مشكله ولها حل، خلّونا نعرف ايش هي العضله النائمه 

العضله النائمه

ايضا تعرف بالخفسه او غمازة الورك لان الأغلب توجد بالورك 

 

 

الجسم الأنثوي الطبيعي مثل الصوره اعلاه ركزو ع الرسم اهم 

من نهاية الخصر يبدأ تقوس الورك ب انسيابيه وتناغم مع باقي الجسم 

للمعلوميه فيه ناس ماتفرق بين الورك والمؤخرة تحسبهم نفس الشي 

الورك: هو التقوس الأمامي، اللي لما توقفين قبال المرايه مباشره يطلع لك بهالشكل (  ) 

المؤخره: هي التقوس الخلفي، اللي لما توقفين ع الجنب يبان التقوس بهالشكل ) 

نرجع لموضوعنا، من اكثر الأماكن اللي تظهر فيها العضله النائمه هي منطقة الورك مما يمنع لك انسيابية الجسم ف تلاقين بنصف المنطقه في مثل الحفره والسبب بهالشي انه الدهون توزعت بشكل خطا، راح أوضح لكم بالصور 



بالصوره المستطيلة وضح لكم انه فيه شي خطأ ب انسيابية المنطقه وهي الحفره، فالدهون صايره فوقها وتحتها 

بالصوره اللي ع اليسار، الدوائر باللون السماوي توضح لك المكان اللي تظهر فيه الخفسه 

طيب كيف تطلع لنا الخفسه، ايش اسبابها عشان اتجنبها بالمقابل؟ 

من اهم اسبابها الجلسه الخطأ، الجلسه اللي نص مايله كانك منسدحه لأنك تضغطين ع منطقه معينه وتمنعين الدهون تتوزع بالتساوي 

يعني حتى لو ما تعانين منها، اجلسي صح عشان ما تطلع لك 

علاج العضله النائمه

العلاج الطبي: هو حقن الفيلر بحيث تتعبا لك هالنطقه المخفوسه وتتساوى مثل ما سوت كيم كردشيان

العلاج الرياضي: مجموعه من التمارين توازن وتوزع لك الدهون بالتساوي ع المنطقه 

التمارين الخاصه بالعضله النائمه

هالتمارين ايضا تساعد بتكبير الورك اذا لبستي معها اثقال كاحل اللي تكلمت عنها بالموضوع اللي راح هنا

 

 

ممكن العضله النائمه تطلع لنحيف؟ ايه نعم ممكن 

النحيف مثله مثل غيره بجسمه دهون وممكن تتوزع خطا! 

خلّونا سوا نشوف اشخاص نحيفين يعانون منها 

 

الحلول المؤقتة للعضله النائمه: 

الخدع البصريه

ابتعدي عن اللبس الضيق الكامل لانه راح يبينها لك، توجهي للبلايز اللي تغطيها لك 

وأخيرا أتمنى تكونون استفدتم من الموضوع، فعلا من اكثر المواضيع المتعبه ما بغيت القا صور عدله

اشوفكم بالموضوع الجاي 

لكم كل الحب

 

 

اثقالالكاحل (استخداماتها وفوائدها)

 

 

السلام عليكم

كيفكم ؟ اتمنى تكونون بصحه وعافيه

موضوع اليوم مثل مو واضح بالعنوان عن اثقال الكاحل والرياضات اللي نستخدمها فيها وفوائدها

بسم الله نبدأ

 

اثقال الكاحل عباره عن اوزان تثبت على الكاحل عن طريق (شك شاك) او مايسمى باللسان الاصق وتوجد بقياسات مختلفه، اللي بالصوره عباره عن ٢ كيلو بمعنا انه كيلو واحد لكل ساق 

متى تستخدم اثقال الكاحل ؟ 

تستخدم مع بعض التمارين لشد وتكوير المؤخره ايضا هالتمارين تساعدك في تناسق وصقل منطقة المؤخره مع الفخذ والساق، تزيل السلوليت. لا تقولون النحاف مافيهم سيلوليت! الا ممكن يكونون عرضه له 

لو سويت هالتمارين بدون اثقال راح تعطي نفس النتيجه؟ ايه راح تحصلين على نفس النتيجه لاكن من غير زياده بحجم المؤخره، يعني اوزان الكاحل راح تساعدك في زيادة حجم هالمنطقه 

من امثلة التمارين :

تمارين leg kic

 

مثل مو شايفين بالصور لها اكثر من طريقه اختاري منها اللي تناسبك وتريحك

ماهو البديل ل اثقال الكاحل؟  حبال المقاومه تؤدي نفس الغرض



ايضا فيه تمارين اخرى راح اتطرق لها بالموضوع الجاي

كم استخدم وزن ؟ ٢ كيلو كويس كمبتدآه 

كم مره أسوي التمرين؟ ٣ جولات، كل جوله ١٠ او ١٢ مره 

يعني ايش جوله؟ يعني تسوين التمرين ١٢ مره ثم ترتاحين ١٠ ثواني بكذا تكونين خلصتي جوله وتسوينه مره ثانيه ١٢ مره تكونين خلصتي جوله ثانيه وهكذا 

أتمنى يفيدكم الموضوع 

انتظروني بكرا بموضوع رياضي ايضا 

دمتم بحب