صباح/ مساء الجمال
بعيد عن الاكل والرياضه هالموضوع يمكن عتاب او نصيحه لك اختي الجميله, ما ادري ايش اوصفه بالحقيقه لاكن هي كومة حكي فيني حابه انها توصل لكل بنت تعاني من النحافه
مثل مافيه شريحه من المجتمع تعاني من السمنه والكل يشجعها ويدعمها, بالمقابل فيه شريحه تعاني من النحافه الشديده ومو لاقيه أي دعم ومع الاسف ان تطرق بعض الاطباء لموضوعهم ما يعطونهم بالقدر الكافي
ما ادري هو استهتار بالموضوع او محد مستوعب انهم محتاجين هالدعم !!
بس هالموضوع ما راح ابحث فيه عن الدعم الخارجي, راح اتطرق فيه لدعمك لنفسك, للكسل والتبلد اللي اشوفه بالنحيفات
كثير اشوف نحيفات جميلات بس النحف مخرب عليهم
الى متى وانتي جالسه تبحثين عن شيء يساعدك بزيادة وزنك وما تطبقينه؟ الى متى بتقولين من بكرا أبدا وكل يوم تأجلينه لبكرا؟ الى ماتجين لمناسبة وتتضايقين من الانتقادات اللي تجيك بعدين؟ الى متى وانتي تشوفين التغيير وماتطبقينه؟ الى متى وانتي تناظرين ملابس نفسك فيها بس ما راح تطلع حلوه ع جسمك؟ الى متى وانتي تحلمين بالجسم المثالي وانتي حاطه يدك على خَدَّك؟
اذا انتي ما تغيرتي من داخلك ما راح توصلين! اذا انتي تعيجزتي وتكيسلتي ما راح توصلين!
قبل فتره شاركت البنات صوره بسناب شات لما كنت نحيفه ولما زاد وزني بغرض تحفيزهم، جاني سؤال *كم جلستي فتره عشان يزيد وزنك؟* جاوبتها ب* قرابة ٥ شهور وهالشي يختلف من بنت لبنت ومع العلم أني لسا باقي اشتغل على نفسي لسا ما وصلت للي ابيه بالضبط* قالت لي يووه مشوار ٥ شهور رياضه وشغل ولك خلق باقي تكملين انا لو مكانك أوقف كذا كويس...
اذا مالك خلق لنفسك، لمين بيكون لك خلق بالحياه؟ كيف تبين الناس يصير لهم خلق لك اذا انتي مالك خلق لنفسك؟ هالخمس شهور وهالسنه والسنتين بتمر كذا والا كذا؟ لاكن اما تمر وانتي طالعه بنتيجه وأما تمر وانتي تدورين على حلول بدون تطبيقها..
لا تحطين لنفسك اعذار تحبط من عزيمتك، تدرسين وما عندك وقت تطبقين اكل صحي لنفسك؟ ( باستثناء انك تقدرين تنظمين وقتك) الاكل الصحي مو بذاك التعقيد فيه كثير وصفات مصوره اعطيها للي يطبخ عندكم بالبيت سواء طباخ او الوالده، بتقولين امي تعترض عالاكل الصحي تقول انه بينحف، ادري باقي فيه امهات الله يهديهم مقتنعين بهالفكره وما ألومهم لان المجتمع فرض هالفكره عليهم بس لا تقولين لها انها وجبه صحيه، قولي يمه شوفي ذا شكله لذيذ وش رأيك تسوينه لنا عالغدا اليوم ومن هالحيل اللي تقدرين عليها. بدل ما انتي جالسه تطلعين اعذار عشان ما تسوين هالشي كوني ايجابيه وطلعي أفكار عشان تساعدك تسوينه. نظمي وقتك وخصصي منه شي لنفسك، لا تقولين ماعندي وقت ! عندك وقت تجلسين تسولفين عالواتساب بالساعات وماعندك نص ساعه لنفسك! عندك وقت تتصفحين تويتر وانستقرام وباث وماعندك وقت بسيط لنفسك! عندك وقت تتابعين اخبار الناس ولا عندك وقت لنفسك! شايفين انه فيه وقت! بس محتاج استثمار فقط.
كل شي بيدك وكل شي موجود حولك وتقدرين توصلين وتسوين اللي تبينه لما تعرفين قيمة نفسك، لما تعطين نفسك حقها قبل كل شي، لما تتيقنين انك جميله وما يليق فيك الا الجمال، لما تقدرين مشاعرك اللي كثير يجرحونها بحكيهم وتطنزهم على جسمك. خلاص الى متى؟ قولي ستوب واعرفي قيمة نفسك وأنك تستاهلين الافضل وابدأي من الآن
اسفه يمكن ثقلت بالحكي وطولت بس حسيته كلام بخاطري لازم اوصله، يمكن حكيي يجرح البعض لكونه حقيقه، بس اجرحك من خلف الشاشه وما تعرفين مين انا وما اعرف مين انتي ولا تجين بموقف تنجرحين فيه من اقارب، كثير انحطيت بمواقف تحز بخاطري بسبب جسمي وهي اللي غيّرتني للافضل وما ودي البنات ينحطون فيها، بخاطري اوريكم وحده وحده انه عندك فرصه قبل لا يأذي مشاعرك شي
طلب اخير، أتمنى اشوف تعليقاتكم عالموضوع ورأيكم فيه وحتى نقدكم
كلنا نتعلم من بعض، ودمتم بسعادة واحلام محققه
